Тӗп герой Ванькка ялта амӑшӗпе пурӑнать, ниçта та ӗçлемест. Сусӑр та мар вӑл, чӑлах та мар, анчах та 35 çула çитсен те авланайман-ха. Тӑтӑш темле ӑптӑр-каптӑр шутласа кӑларса пуйса кайма е чап çӗнсе илме ӗмӗтленет. Ялта ӑна пурте Чуххӑм тесе чӗнеççӗ.

Анчах та кунашкал пурнӑç унӑн амӑшне — Анфис аппана — килӗшсех каймасть, вӑл мӑнуксем çинчен ӗмӗтленет, вӗсене утьӑкка сиктересшӗн. Кӳршӗ Кури тетен вара хӑйӗн харкам шухӑшӗ, вӑл Ваньккана авлантарса Анфиса киле кӗртесшӗн, юлташӗсене пулӑшма ыйтать. Килӗшеççӗ хайхисем: пӗрне илсе килеççӗ — ытла та хитре, тепри — чӑпар та ачаллӑ. Виççӗмӗшӗ — Тамара, тӳрех килте «кам хуçа» иккенне кӑтартма пуçлать.

Спектакль режиссерӗ — Чӑваш Республикин тава тивӗçлӗ артистки Наталия Сергеева, художникӗ — Светлана Зверева.